حمید کاشمیری کا اصل نام عبدالحمید تھا۔ وہ یکم جون 1929ء کو بانسرہ گلی، مری میں پیدا ہوئے۔ان کا شمار فعال ادبیوں میں ہوتا تھا۔ انہوں نے بے شمار افسانے، پندرہ سے زائد ناول اور ٹیلی ویژن کے لیے پچاس سے زائد انفرادی ڈرامے، ڈرامہ سیریلز اور ڈرامہ سیریز تحریر کیں۔ جنھیں بے حد پسند کیا گیا اور ان کی مقبولیت آج بھی برقرار ہے۔ 
حمید کاشمیری کے ڈراموں میں پت جھڑ، ایمرجنسی وارڈ، روزنِ زنداں، شکستِ آرزو، اعتراف، کشکول، کافی ہاؤس، لغرش اور ہفت آسمان شامل ہیں۔ان کے ناولوں میں پہلا آدمی، ادھورے خواب،ڈھلان، الائو اور اڑان اور افسانوی مجموعے دیواریں اور سرحدیں شامل ہیں۔انھوں نے مختلف اخبارات میں کالم بھی لکھے جن میں حریت، مساوات، نصرت اور نگار شامل ہیں۔
حمید کاشمیری کو 1973ء میں ان کے ڈرامے ‘پت جھڑ کے بعد’ کے لیے میونخ ڈراما فیسٹویل میں انعام دیا گیا۔ ان کے علاوہ پاکستان رائٹرز گلڈ، نگار اور انسانی حقوق کی تنظیم کی طرف سے بھی انعام سے نوازا گیا۔ ان کی وفات 6جولائی 2003ء کو کراچی میں ہوئی۔