ثمینہ نذیر کے والدین کا تعلق حیدر آباد دکن سے ہے لہٰذا ان کی تحاریر اور سوچ پر دکن کی گہری چھاپ ہے۔ کراچی یونیورسٹی سے زولوجی میں بی ایس سی آنرز اور پھر اینٹومولوجی میں ماسٹرز کی ڈگری حاصل کی۔ کراچی میں  تعلیم و تربیت اور پھر شادی کے بعد، عمر کا ایک بڑا حصہ بیرون ملک گزارا۔ جن میں افریقہ، امریکا اور یورپ قابل ذکر ہیں۔
۲۰۰۸ء میں کراچی کی محبت نے واپس وطن بلالیا۔ NAPA   سے باقاعدہ تھیٹر نگاری و دیگر تھیٹر آرٹس میں ڈپلومہ حاصل کیا۔ یہاں  سے فارغ التحصیل ہونے کے بعد اپنا پروڈکشن ہائوز قائم کیا۔ جہاں   سےٹی وی، NGO، شارٹ فلمز، تھیٹر وغیرہ کے لیے بے شمار کہانیاں لکھیں اور پروڈیوس کیں۔ فلم، ٹی وی، تھیٹر اور ویب سیریز کے لیے باقاعدہ ادا کاری بھی کرتی ہیں۔ اپنے افسانوں کی خود قصہ گوئی کرنے کا رواج ثمینہ نے ڈالا ہے۔ ان کا افسانوں کا مجموعہ ‘کلو’ اس طویل سفر کا چشم دیدہ گواہ ہے۔