ڈاکٹررفیع مصطفیٰ نے ۱۹۶۹ میں یونی ورسٹی آف برٹش کولمبیا سے کیمسٹری میں پی ایچ ڈی کیا اور اس کے بعدپاکستان، سوڈان، برطانیہ اور کینیڈا کی متعدد یونی ورسٹیوں میں تدریس و تحقیق میں مصروف رہے۔ ۱۹۹۱ میں کینیڈا میں  انڈس فلو سسٹمزکے نام سے ایک کمپنی کی بنیاد ڈالی جس کا فنانشل سافٹ ویئر دنیا کے مختلف ممالک میں استعمال کیا جاتا ہے۔ 
پیشہ ورانہ مصروفیات کے علاوہ وہ پچھلے ۳۵سال سے انٹرنیشنل ڈیویلپمینٹ اینڈ ریلیف فاؤنڈیشن (IDRF)سے  بطور بورڈ ممبراور صدر وابستہ رہے ہیں، اور اب گورنرز کاؤنسل کے ممبر کی حیثیت سے خدمات انجام دے رہے ہیں۔ یہ فاؤنڈیشن پاکستان کے علاوہ دنیا کے ۴۰ ممالک میں ہنگامی حالات میں مدد پہنچانے کے علاوہ صحت، تعلیم، غذا اور صاف پانی  کے شعبوں میں امداد فراہم کرتی ہے۔ علاوہ ازیں ڈاکٹر مصطفیٰ یونی ورسٹی آف ٹورانٹو کے ایمینوئیل کالج کے مسلم اسٹڈیز پروگرام سے مشاورتی حیثیت سے وابستہ ہیں۔اُن کی ادبی تصانیف میں تین ناول اور متعدد مختصر کہانیاں شامل ہیں۔