فیض احمد فیض اور سیّد سبطِ حسن کی رفاقت کا زمانہ چالیس سال سے زائد عرصے پر محیط ہے۔ ہر دو معاصرین میں سیاسی اور فکری یگانگت مثالی تھی، سُخن در سُخن اس دعوے کا روشن ثبوت ہے۔ فیض صاحب کی زندگی میں جو نشیب و فراز آئے اور جن واقعات و حادثات نے ان کے قلب و ذہن پر گہرا اثر ڈالا، ان کا اثر سبطے صاحب کے افکار و جذبات پر بھی نمایاں ہے، چنانچہ فیض صاحب کی شاعری کے سیاسی پس منظر کو بیان کرنے کے لیے سبطے صاحب سے زیادہ معتبر کوئی اور شخص نہیں ہوسکتا۔ سبطے صاحب نے اس کام کو اپنے لیے ایک اہم فریضہ سمجھا اور اس پر زندگی کے آخری دنوں تک کام کرتے رہے۔ ادب کی تفہیم اور ادبی شعور کی بیداری میں فیض صاحب کی شاعری نے جو کردار ادا کیا ہے، سبطِ حسن نے وہی کام اپنی سادہ اور بلیغ نثر کے ذریعے انجام دیا ہے۔